KORONADAL CITY – Lauman ang mas hugot nga pagpatuman sang enhanced community quarantine sa siyudad sang Koronadal kadungan sang pormal nga pag-implementar sini kagab-i.
Ini ang ginpahayag ni Koronadal City Mayor Eliordo Ogena sa interbyu sang Bombo Radyo Koronadal.
Ginpaathag sang alkalde nga ginpatuman ang nasambit nga Executive Order No. 40 kun sa diin ginbase ini sa nationwide implementation mangin sa regional nga level.
Suno kay Mayor Ogena, kalakip sa mga pagsulondan diri amo ang pag-cluster sa 27 ka mga barangay, kag paglimita sa pagbyahe sang mga tricycle nga may sakay nga isa ka pasahero nga nakasuksok sang face mask.
Magluwas diri, hugot man nga igaimplementar ang No Movement kada Dominggo, buot silingon wala sang may magaguwa ukon maglagaw sa sini nga adlaw.
Magluwas sini, ginsapol niya man ang mga mall owners kag nadesisyonan nga igadul-ong nila ang produkto sang mga konsumidores nga nagikan sa iban nga banwa.
Dugang sang alkalde nga tinutuyo sang nasambit nga tikang nga malimitahan ang hulag sang tawo kag ma-control ang pagdagsa sang mga pumuluyo mangin man ang paghugot sang social distancing.
