KORONADAL CITY- Nagatanyag sang sikolohikal nga bulig ang isa ka grupo sang mga social workers para sa tanan mangin sa mga frontliners nga naapektohan sang covid-19.
Sa interbyu sang Bombo Radyo Koronadal kay Dr. Loveleih Quemado, ang RSW-Group Leader sang United Registered Social Workers for Region 12, abri ang ila talatapan kag ang ila mga volunteers sa pagbaton sa sin-oman nga indibidwal kalakip na ang mga nagapanguna sa kampanya batok sa nasambit nga balatian nga luyag mahagan-hagan ang ila kabalaka kag kahadlok.
Suno kay Dr. Quemado, nakahanda ang ila mga guidance counselors kag psychologists sa paghatag sang mga advice sa bug-os nga rehiyon.
Magluwas diri, nagapalapta man sila sang mga leaflets angot sa coronavirus disease agud mapalapad pa ang ihibalo sa paglikaw sa nasambit nga balatian.
Ginpasiguro man ni Quemado nga magapabilin nga confidential ang identity sang mga indibidwal nga magapadulong sa ila mangin ang igapakigbahin nga mga impormasyon.
