KORONADAL CITY – Nagsaka na sa 14 ang kaso sang kumpirmado nga kaso sang coronavirus infectious disease sa Region 12 makaligad nga nadugang ang pinakauna nga kaso sa siyudad sang Koronadal.
Sa interbyu sang Bombo Radyo Koronadal kay Arjohn Gangoso, health education and promotions officer sang DOH 12, sa nasambit nga numero, lima ang halin sa siyudad sang Cotabato, 3 sa Sultan Kudarat, 2 sa South Cotabato, 2 sa North Cotabato, 1 sa siyudad sang General Santos kag 1 naman sa siyudad sang Koronadal.
Nahibaloan nga apat sa mga nagpositibo ang nagtambong sa bulang sa siyudad sang Davao samtang ang iban naman ang kaupod sa mga Islam preachers nga nagtambong sa isa ka religious gathering sa Malaysia.
Kaangot sini, nahisgotan suno pa sang mga opisyal sa bug-os nga rehiyon nga palawigon pa ang pagpatuman sang Enhanced Community Quarantine tubtob sa Abril 30, 2020.
Suno kay DILG-12 Regional Director Josephine Leysa, ikaayo sang mga pumuluyo sa bug-os nga rehiyon 12 ang ginahuna-huna sang mga opisyal gani kooperasyon sang tanan ang ginapangayo kag panawagan sini.
