KORONADAL CITY – Ginpalawig pa sang 10 ka adlaw ang ginapatuman nga total calibrated lockdown sa probinsya sang South Cotabato.
Ini ang ginpahayag ni South Cotabato Governor Reynaldo Tamayo Jr. base sa iya ginpaguwa nga Executive Order No. 21 nga nagaamyenda sa EO 18 kun sa diin magaumpisa ini buwas nga adlaw, Abril 4 kag magatakop ini sa Abril 14, 2020.
Suno kay Gov. Tamayo, ginhimo sini ang nasambit nga extension bangud sa padayon nga pagsaka sang kumpirmado nga kaso sa kaiping nga mga rehiyon sa sulod sang pila ka adlaw.
Ginpahayag sang gobernador nga igapatuman ang nasambit nga extension makaligad ang pagsinapol sa South Cotabato Integrated Provincial Health Office kag Philippine Medical Society – South Cotabato chapter.
Apang ginpaklaro sini nga nagapabilin ang mga pagsulondan nga ginapatuman sang EO 18 sa nasambit nga bag-o nga kamandoan.
