KORONADAL CITY – Gin-arestar sang mga kapulisan ang isa ka lalaki nga nagpakuno-kuno nga empleyado sang Department of Health sa checkpoint sa banwa sang Tantangan.
Ginkilala ang nasambit nga suspek nga si Leo Puig.
Sa impormasyon nga nakuha sang Bombo Radyo Koronadal, nagapanghatag suno pa sang certification si Puig agud makabiyahe ang mga public utility van.
Baliskad naman ini sa ginpaguwa nga executive order no. 18 ni South Cotabato Gov. Reynaldo Tamayo Jr nga suspendido ang tanan nga public mass transport sa sulod sang 14 ka adlaw samtang ginapatuman ang total calibrated lockdown.
Ginasiling nga nabiktima na sini ang pito ka van drivers kag kundoktor agud mahatagan ang mga ini sang ginapatihan nga certification to travel.
Sa interbyu naman sang Bombo Radyo kay Koronadal City Investment and Promotion Officer Elric Batilaran, hugot sini nga ginapanginwala ang pagpanagtag sang certification kag ginduso nga wala sila sang hurisdiksyon agud magpanagtag sang mga ini.
Ila man nga ginakonsiderar ang pagsang-at sang kaso sa nasambit nga suspek.
Sa subong nakapreso na si Puig sa lockup cell sang Koronadal PNP kag nagapangatubang man sa patong-patong nga kaso..
