KORONADAL CITY – Ginpasiguro sang Philippine Army ang padayon nga operasyon batok sa mga lawless elements kag terror groups nga nagatuga sang kalakasan labi na sa probinsya sang Maguindanao.
Suno kay 601st Infantry (Unifier) Brigade commander Col. Jose Narciso, padayon ang ila pursuit kag surgical operations agud lagson ang mga armado kag terorista nga grupo.
Ini makaligad nga narekober ang pila ka matag-as nga kalibre sang armas kag improvised explosive device (IED) sa magkatuhay nga engkwentro sang mga suldado kag Daesh- inspired terrorist group sa Maguindanao.
Nasapwan man sang mga katapo sang 57th Infantry Batallion ang duha ka IED sa bahin sang Brgy. Salman sa banwa sang Ampatuan.
Samtang narekober naman sang mga miyembro sang 1st Mechanized Infantry Battalion ang duha ka improvised rifles, pila ka sako sang bugas, mga bala kag IED sa bahin sang Brgy. Tuayan, Datu Hoffer.
Ginpasiguro naman ni Western Mindanao Command (Westmincom) commander Lt. Gen. Cirilito Sobejana nga magapadayon ang ila mga opensiba batok sa nasambit nga mga grupo agud masiguro ang kalinong sa Mindanao.
