KORONADAL CITY – Mas ginpahugtan pa ang mga entry kag exit points sa siyudad sang Koronadal kag South Cotabato agud indi makalusot ang anuman nga salakyan nga may dala nga mga baboy ukon mga processed meat batok sa African swine fever (ASF).
Sa bahin sang Brgy. Morales diri sa siyudad, makit-an ang mga katapo sang City Veterinarian Office nga may dala nga knapsack spray sa veterinarian quarantine section kun sa diin ila nga ginahibalo ang mga impormasyon kag destinasyon sang mga livestock carriers.
Sa interbyu sang Bombo Radyo Koronadal kay Allan Allado, isa sa mga nagabantay sa nasambit nga checkpoint, 24 oras sila nga nakabantay kag nakaalerto sa nagaagi nga mga salakyan kag wala ginapasulod ang mga wala sang certificate ukon dokumento nga magapamatuod nga luwas sa ASF ang ila livestock ukon karne.
Nagapanawagan man ini sa mga pumuluyo nga magbuliganay agud matapna ang paglapnag sang nasambit nga balatian.
