KORONADAL CITY – Nagapangayo sang bulig subong ang pamilya sang isa ka Pinay DH nga ginpatihan ginpatay sang iya nga employer sa pungsod Kuwait.
Ginkilala ang biktima nga si Jeanelyn Villavende, 26 anyos kag residente sang Barangay Tinago, Norala, South Cotabato.
Sa eksklusibo nga interbyu sang Bombo Radyo Koronadal kay Ginang Nelly Padernal, tiya sang biktima, maglima ka bulan pa lamang si Jeanelyn sa employer sini sa Kuwait kag wala nila ginlauman nga kasubong sini ang matabo sa iya.
Suno kay Padernal, ginpahibalo lamang sa ila sang DFA kahapon nga ginbawian sang kabuhisi Jeanelyn sa isa ka hospital sa Kuwait kag wala pa sila makahibalo sang rason sang kamatayon sini bangud nagapadayon pa ang imbestigasyon sang mga otoridad.
Antes pa ang nasambit nga balita nga ginpatay ini sang iya nga employer, pila ka bulan na nila ini nga wala maistorya kun diin ang katapusan nga naistorya ini sa telepono sang Oktubre 27, 2019.
Sa subong, blangko sa gihapon ang pamilya Villavende kun ano gid ang natabo sa iya.
Nahibaluan nga una nga tion pa lamang ini nga nag-abroad agud kuntani makabulig sa iya pamilya kag makapatukod sang puluy-an.
Suno sa tiya sini, isa ka pulis ang employer nga lalaki sang biktima.
Nagalaum naman ang pamilya nga mabuligan sila sang gobyerno nga mapapauli sa pungsod ang bangkay sini kag masilutan ang iya employer.
Si Jeanelyn ang subang sa tatlo ka mag-ulutod.
