KORONADAL CITY- Nagsirbe nga tanda sang kapag-on sang mga taga Koronadal ang isa ka Giant Christmas Tree nga gintukod sa syudad nga sentro subong sang kritisismo kag pagpakamalaot makaligad matumbalay kag maguba bangud sa tuman ka baskog nga hangin sang nakaligad nga adlaw.
Nahibaluan nga yara sa 120 feet ang Giant Christmas Tree kag may yara sang 2,500 ka bituon nga lantern sang mga katutubo halin sa Brgy. Assumption nga apektado man sang nakaligad nga linog.
Suno kay Koronadal City Mayor Eliordo Ogena, kabahin ini sang livelihood opportunity sang mga katutubo agud may yara ang mga ini nga palangabuhian ilabi na subong nga paskwa apang naguba ini sang mabaskog nga hangin kag ulan.
Bangud sa panghitabo, gin ulan sang kritisismo ang nasambit nga proyekto apang nagpanawagan ang City Government nga indi ini pagkadlawan bangud produkto ini sang mga kauturan nga katutubo nga ang tinutuyo amo ang mapasadya ang mga pumuluyo nga makakita sini.
Dugang pa nga wala man sang may luyag nga maguba ang ginpangabudlayan nga Giant Christmas Tree.
Magasirbe naman ini nga isa ka halimbawa nga sa kada pagtumba may tion pa sa pagbangon basta magbinuligay ang tanan.
Sa pihak nga bahin, ginatinguhaan na nga ibangon liwat sang City Government ang Giant Christmas Tree pakigbuligay sang CGSO, City Engineering Office agud nga matapos ang nasambit nga proyekto subong nga Christmas Season
