KORONADAL CITY- Nagsaka na sa masobra 17,000 indibidwal ang apektado sa rehiyon 12 kasunod sang Magnitude 6.6 sang Martes nga nagsentro sa banwa sang Tulunan, North Cotabato.
Sa esklusibo nga interbyu sang Bombo Radyo Koronadal kay Office of the Civil Defense ukon OCD 12 Asst. Regional Director Jerome Barranco, gintutukan na nila subong ang mga biktima sang mabaskog nga linog ilabi na sa North Cotabato kag South Cotabato.
Suno kay Barranco, ginapreparar na nila ang bulig sa 17, 520 nga indibidwal ukon 3,504 pamilya nga naapektuhan sang linog sa banwa sang M’lang, Tulunan, Makilala kag Kidapawan City kun sa diin nalakip ang 36 ka barangay.
Kaangot sini, halos 1,300 naman pamilya ukon 6, 460 indibidwal ang nagapabilin sa gihapon sa mga evacuation centers sa probinsya.
Yara naman sa 511 ang puluy-an nga napagkit nga otally damage samtang 1,187 naman ang partially damaged.
Naglab-ot naman sa 5 ang napagkit nga napatay sa rehiyon bangud sa linog nga ginapalab-utan na sang bulig.
Sa subong, nakatutok man ang ahensya sa paghatag sang pagkaon, tents, tubig kag iban pa nga panginahanglanon sang mga sibilyan nga apektado.
Kabulig man sang OCD 12 ang Department of Social Welfare and Development ukon DSWD, Department of Health ukon DOH, Philippine Red Cross kag ang kada LGU sa paghatag sang psycho-social processing sa mga sibilyal kag humanitarian workers nga nakabatyag sang trauma.
Samtang, padayon man ang pagpahanumdom sini sa publiko nga mangin kalmado kag alerto sa tanan nga oras bangud posible pa nga madugangan ang 200 aftershocks nga napagkit matapos ang linog.
