KORONADAL CITY- Hugot sa gihapon ang monitoring sang Office of the Civil Defense Region 12 sa nagkalain-lain nga banwa sa bug-os nga rehiyon bangud sa asud-asod kag mabaskog nga mga aftershocks nga napagkit kasunod sang nag-igo nga Magnitude 6.3 nga linog sa dako nga bahin sang Mindanao.
Sa ekslusibo nga interbyu sang Bombo Radyo Koronadal kay OCD 12 Assistant Regional Director Jerome Barranco, nakapagkit na sang halos 2,700 nga puluy-an nga naguba bangud sa pagtay-og kun sa diin may yara sang partially kag totally damaged luwas pa sa mga commercial buildings kag mga buluthuan.
Samtang nagsaka naman sa tatlo ang patay halin sa M’lang, Alamada kag Makilala, North Cotabato samtang yara sa masobra 100 man ang napagkit nga pilason kag nagka anxiety attack nga gindangat sa mga balay bululngan apang kadamuan nakagawas na.
Samtang may mga bakwit man ilabi na sa mga naga-istar malapit sa Mt. Apo kag may mga napagkit man nga landslide sa Tulunan, Makilala kag Kidapawan City.
Yara sa masobra 700 aftershocks ang napagkit kun sa diin gin-awhag sang OCD ang mga pumuluyo nga magpabilin nga alerto kag indi pagkalipatan ang Duck, Cover and Hold sa oras sang linog.
