KORONADAL CITY – Padayon pa nga ginahibalo ang balor sang mga damyos sa probinsya sang North Cotabato makaligad ang pag-igo sang 6.3 magnitude nga linog sadtong Miyerkules sang gab-I.
Ginpahayag ni Mercy Forunda, ang PDRRMO chief sang North Cotabato sa interbyu sang Bombo Radyo Koronadal, nga base sa damage assessment halin sa tagsa ka mga reports sang LGU, kalakip sa mga nahalitan sang linog ang duha ka commercial building sa Tulunan, shrine, birthing center kag barangay hall sang Brgy Batang nga ginkonsiderar nga unfit to work.
Sa bahin sang Makilala, yara sa masobra 200 ka panimalay ang nadamyosan kag ginalauman pa ang pagsaka sini pinaagi sa ginahulat nga mga damage reports subong nga adlaw.
Sa pihak nga bahin, ila man ginahatagan prayoridad ang panginahanglanon sang mga evacuees partikularmente ang ila mga pagkaon kun sa diin ginmandoan ang mga LGUs nga magbulig sa ila kun sa diin maga-augment lamang ang provincial level kun kinahanglan.
Nahibaloan nga masobra 90 ang napagkit nga pilason sa bug-os nga mga apektado samtang anom naman ang patay.
Sa pihak nga bahin, nagapanawagan si Cotabato executive secretary Anecito Rasalan nga mangin responsable sa pag-post sa social media nahanungod sa linog agud indi magtuga sang kahadlok partikularmente sa mga pumuluyo nga tuman nga apektado sang nasambit nga pagtay-og.
