KORONADAL CITY- Nilibo ka indibidwal na subong ang apektado sa nagluntad nga magnitude 6.3 nga linog sa dako nga bahin sang Mindanao.
Sa ekslusibo nga interbyu sang Bombo Radyo Koronadal kay Office of the Civil Defense ukon OCD 12 Assistant Regional Director Jerome Barranco, nagapadayon subong ang assessment sang ila ahensya sa malapnagon nga epekto sang nasambit nga pagtay-og.
Sa rehiyon 12, naglab-ot sa siyam ang pilason halin sa bahin sang Kidapawan City kag Makilala, North Cotabato kag may napagkit nga patay.
Luwas sa napatay kag injured, yara sa 11 ka puluy-an ang nawasak sa nasambit nga linog sa Tulunan, North Cotabato nga sentro sang nagluntad nga linog.
Sa South Cotabato naman 53 ang nalipong bangud sa kahadlok apang yara na sa maayo nga kondisyon.
Naglab-ot naman sa 23 ka mga edifisyo nga ginapanag-iyahan sang gobyerno ang slightly kag severely damaged sa North Cotabato kag South Cotabato samtang nakapagkit man sang sunog kag pagkaguba sa mga malls sa General Santos City.
Sa karon nagalab-ot sa 31 ka munisipalidad sa rehiyon 12 ang nagkanselar na sang klase.
Nagapadayon man ang monitoring sa nagluntad nga landslide sa mga banwa sang Tulunan, Makilala kag Kidapawan sa North Cotabato.
