KORONADAL CITY- Nagdesiyon si Koronadal City Mayor Eliordo Ogena nga kanselaron na lang ang klase sa tanan nga lebel makaligad mag-igo ang Magnitude 6.3 nga linog sa Mindanao.
Madumduman nga sentro sang linog ang banwa sang Tulunan, North Cotabato samtang nakabatyag man sang linog ang bahin sang South Cotabato, Sultan Kudarat, GenSan kag pila ka bahin sang Davao Region.
Kaangot sini, hugot ang monitoring nga ginahimo sang lokal nga gobyerno kun sa diin activated ang 911 responders sang syudad agud nga magbulig sa mga apektado sang linog.
Samtang ginalauman ang aftershocks rason nga ginapaandaman ang tanan nga maghalong apang likawan ang pagpanic.
Dumdumon ang Duck, Cover and Hold kag magpalayo sa mga butang nga pwede matumba ukon makatuga sang halit.
Samtang ginapangabay man nga likawan ang pagpalapta sang fake news kasubong sang pag-angkon sang Tsunami agud indi magtuga sang kahadlok sa mga pumuluyo ilabi na sa coastal areas.
Mas pilion magtinir sa mas luwas nga lugar agud mapasiguro ang kaluwasan sang tagsa-tagsa.
