KORONADAL CITY- Nagpalab-ot sang pagpasalamat ang pamilya sang isa ka Overseas Filipino Worker sa Saudi Arabia makaligad ini nga tigayon nga nakapauli sa pungsod makaligad magmasakit sa nasambit nga pungsod.
Madumduman nga nabedridden ang 50 anyos nga si Larry Bette nga nagatrabaho bilang isa ka plumber sa isa ka military base sa Dammam, Saudi Arabia kun sa diin pila ka tuig sini nga gin-agwanta ang iya nga kahimtangan nga malayo sa pamilya kag masobra duha ka bulan nga naka confine sa balay bululngan
Nawad-an man ini sang trabaho kun sa diin ang mga kaupdanan nga Pinoy na lamang ang naga-asikaso sa iya kag nabudlayan man ang iya pamilya nga mapapauli ini sa pungsod.
Makaligad nga ginpalab-ot sa Bombo sang iya asawa nga si Gng. Ivy Bette ang ila problema, nakig-angot ang Bombo kay Bombo International Correspondent Boyet Forro agud nga maasikaso ang pagpauli sang nasambit nga OFW kag tigayon na ini nga nakapauli.
Pag-abot naman sa pungsod, gin-asikaso sang Overseas Workers Welfare Administration ukon OWWA ang iban nga panginahanglanon ni Larry tubtob sa nakabalik na ini sa ila lugar sa Prk. Kahilwayan, Brgy. Manuel Roxas Sto. Niño, South Cotabato.
