KORONADAL CITY- Yara sa high alert status sa gihapon ang bug-os nga probinsya sang Maguindanao makaligad ang pag-atake sang Bangsamoro Islamic Freedom Fighters o BIFF sa Moro Islamic Liberation Front o MILF community kag mga sibilyan sa Shariff Saydona Mustapha mangin man ang natabo nga pagsigabong sa Datu Piang, Maguindanao.
Sa interbyu sang Bombo Radyo Koronadal kay Western Mindanao Command o WesMinCom spokesman Major Arvin Encinas, apisar padayon pa nga ginatumod ang mga yara sa likod sang pagsigabong sa Datu Piang, indi makakas ang posibilidad nga konektado ini sa pag-atake sa Shariff Saydona Mustapha.
Kaangot sini, mas ginpahugtan pa sang militar ang paglagas sa terorista nga grupo ilabi na nga suportado sa gihapon ang BIFF sang mga international terror groups ilabi na ang Islamic State of Iraq and Syria ukon ISIS.
Nahibaluan nga tatlo ka paksyon sang BIFF ang nagapanggamo subong sa Maguindanao kag kalapit nga mga banwa nga ginalakipan sang Bungos, Karialan at Abu Toraife terror group.
