KORONADAL CITY- Nagapadayon sa gihapon ang imbestigasyon sang Tantangan PNP angot sa nasapwan nga bangkay sang isa ka unidentified pa nga persona nga ginapatihan nga miyembro sang Lesbian, Gay, Bisexual,Transgender ukon LGBT community sa nasambit nga banwa.
Sa impormasyon nga nakuha sang Bombo Radyo Koronadal, isa ka pumuluyo sang Prk. Bagong Silang, Brgy. Tinongcop, Tantangan, South Cotabato ang nagpalab-ot sang report sa mga otoridad nga isa ka bangkay ang nasapwan sa ila nga lugar.
Gilayon ini nga ginpadulungan sang mga otoridad kag nasapwan ang bangkay sang isa ka ginapatihan nga miyembro sang LGBT community nga naka legging pants, nakasuksok sang duag yellow nga T-shirt, may malaba kag kulot nga buhok kag yara sa 5’2 ang kataason.
Dugang pa sini nga ginabulubanta yara sa pang-edaron nga 30-35 anyos ang biktima kag may tattoo sa wala nga dughan nga nakapagkit ang “Arvin” kag microphone.
Natukiban man nga may duha ka igo sang bala sang cal. 45 nga armas luthang ang biktima nga gintunaan sang iya kamatayon.
Sa karon nagapadayon pa ang imbestigasyon sang Tantangan PNP.
