KORONADAL CITY- Pormal na nga nagpungko ang bag-o nga hepe sang Highway Patrol Group sang South Cotabato nga si Police Lt. Danilo Lopez.
Nahibaluan nga si Lopez ang 32 ka tuig na nga nagaserbisyo kun sa diin may madamo nga accomplishment halin sa iya pagpamuno sa North Cotabato kag Davao Oriental.
Sa interbyu sang Bombo Radyo Koronadal kay Lopez, ginpasiguro sini nga magapadayon ang mga maayo nga nasuguran sang HPG ilabi na sa pagtapna sang carnapping kag kriminalidad sa dalanon kag pagpangdakop sa mga wanted nga mga persona.
Kaangot sini, ginhatagan punto man ni Lopez nga hugot man sini nga igapatuman sa South Cotabato ang panibag-o nga memorandum kun sa diin pagadakpon kag pagapamultahon ang mga cargo kag pickup truck nga nagapasakay sang tawo sa likod sini.
Nagakadapat nga wala sang tawo nga magasakay sa likod ilabi na nga masami ini ginatunaan sang mga disgrasya kag kamatayon sang mga pasahero nga ginarisgo ang ila kabuhi sa pagsakay sa likod sang mga cargo kag pickup trucks.
