KORONADAL CITY- Ginkustodiya na sang Philippine Drug Enforcement Agency ukon PDEA 12 ang isa ka misis makaligad ini madakpan sang mga jail guard sang South Cotabato Provincial Jail nga naghana magpasulod sang shabu sa nasambit nga jail facility.
Sa interbyu sang Bombo Radyo Koronadal kay SoCot jail warden Felicito Gumapac, gilayon nga ginpaidalom sa interogasyon si Joy Marcera, 41 anyoa nga residente sang Brgy. Avanceña, Koronadal City nga magabisita kuntani sa iya bana nga nakapreso sa Provincial Jail apang natukiban sa tsinelas sini nga may yara sang medium size nga pakete sang shabu.
Ginhimuan suno pa sang compartment ni Marcera ang iya madamol nga tsinelas kag didto ginbutang ang shabu.
Ginabulubanta yara sa P100,000 ang balor sang iligal nga droga nga ginhana sini ipasulod.
Samtang kaangot sini, igadetain naman si Marcera sa separar nga jail facility nga malayo sa iya nga bana nga may kaso man sang iligal nga droga agud indi mapadayon ang ila mga iligal nga aktibidad.
