KORONADAL CITY- Pormal na nga nagpungko ang bag-o nga magapamuno sa City Road Safety Management Office kag kaangot sini ginpahayag ni Ret Col. Raul Miramon nga indi sini luyag sang factionalism sa idalom sang iya pagdumalahan bilang bag-o nga Koronadal City Road Safety Management Chief.
Ini makaligad ginkakas si Ruel Bagunoc makaligad magtakop ang kontrata sini kag bangud man sa gina alegar nga asud-asod nga mga kontrobersiya nga ginakaulamiran sini batuk kay Koronadal City Mayor Eliordo Ogena.
Sa interbyu sang Bombo Radyo Koronadal kay Miramon, antes pa ini pormal nga nag pungko sa bag-o nga posisyon, nag imbestigar ini sa Koronadal City Traffic kun sa diin may mga wala sang paghangpanay sa sulod sang talatapan nga ginakaulamiran ni anay Road Safety Management Chief Ruel Bagunoc kag pila pa ka mga katapo sang ahensya.
Isa ini ka patimaan nga indi mangin epektibo ang isa ka ahensya kun may factionalismo nga luyag sini tadlungon sa idalom sang iya pagpamuno.
Samtang sa pihak nga bahin, gin insister naman ni Ruel Bagunoc nga kasubong gintonto lang suno pa ini ni Koronadal City Mayor Eliordo Ogena bangud nakapirma na ini sang panibag-o nga kontrata apang kasubong nabawi.
Kaangot sini ginpahayag man ni Bagunoc nga madamo suno pa kag nagapadayon ang kurapsyon sa idalom sang Ogena administration kag ginhatagan punto nga apisar wala na siya sa pwesto mangin numero uno ini nga kritiko sang Ogena administration.
Madumduman nga nag ibwal ang wala paghangpanay ni Bagunoc kag Ogena bangud sa pagrelieve ni Bagunoc sa iya deputy nga si Perlie Tolentino kag iban pa bangud sa alegasyon sang pagpangotong mangin man ang pagbuyagyag sini nga gina-usar man sang isa ka staff ni Mayor Ogena nga si Mae Valenzuela ang pangalan sang alkalde agud magpang-arbor sang mga naka impound nga salakyan.
Nagpagwa man sang hibubun-ot si Bagunoc bangud wala suno pa naaksyunan ni Mayor Ogena ang iya reklamo batuk sa kay Tolentino, Valenzuela kag iban pa nga nalamita sa gina alegar sini nga anomalya.
Samtang kaangot sini gin-insister ni Mayor Ogena nga kabutigan ang mga ginapahayag ni Bagunoc kag ginabaliskad suno pa sini ang mga nagakatabo.
Dugang pa sini nga wala suno pa sang kamatuoran nga wala ini sang nangin aksyon sa mga reklamo ni Bagunoc angot sa pila ka mga empleyado sang City Government nga gina alegar naulamid sa mga anomalya kag sa baylo ginhulat sini ang pormal nga reklamo halin kay Bagunoc apang sa baylo ginpangibabaw suno pa sini ang pagpalapta sang mga sala nga impormasyon.
Ginpahayag man sang alkalde nga nagakadapat tanan nga tikang ukon aksyon ang maga agi sa imbestigasyon kag nagakaigo nga proseso.
Gintawag man sini nga pasaway si Bagunoc sa iya nga administrasyon makaligad nga kasubong nadulaan sang respeto kag kooperasyon suno pa sa idalom sang iya administrasyon.
