KORONADAL CITY- Magahatag sang pinansyal nga bulig ang lokal nga gobyerno sang banwa sang Surallah South Cotabato sa mga biktima sang pagkahulog sang forward truck sa Brgy. Lamsalome, Tboli, South Cotabato.
Sa ekslusibo nga interbyu sang Bombo Radyo Koronadal kay Surallah Mayor Antonio Bendita magahatag sila sang inisyal nga P10,000 nga financial assistance sa kada biktima sang nasambit nga aksidente kag ini ang madugangan pa.
Kabug-usan nga P10,000 kada isa ang kantidad nga igahatag sa mga biktima buhi man ukon napatay kag gin-awhag ang mga himata nga magpadulong sa Municipal Hall sang Surallah agud makabaton sang financial assistance
Nagpalab-ot naman sang pagpangasubo si Mayor Bendita sa mga biktima kag sa nabilin nga pamilya ilabi na nga kadamuan sa mga biktima ang mga residente sang Surallah.
Madumduman nga 20 ang patay, 14 ang pilason sa nasambit nga aksidente makaligad nahulog sa pil-as ang forward truck sa Brgy. Lamsalome Tboli, South Cotabato sang papuli na ang mga biktima halin sa GenSan makaligad mag family outing.
