KORONADAL CITY- Nagdangop sa Koronadal City Police Station ang isa ka persona nga biktima man suno pa sang pagpanonto sang Budol-Budol Gang sa syudad sang Koronadal.
Ginkilala ang biktima nga si Roy Belenario, yara sa legal nga edad kag residente sang syudad sang Koronadal.
Sa ekslusibo nga interbyu sang Bombo Radyo Koronadal, nabiktima ini sang Budol-Budol gang makaligad magbisita suno pa ang 2 ka mga lalaki sa iya nga farm lot sa Brgy. Crossing Rubber Tupi, South Cotabato kag nag engganyo sa iya nga matriple ang iya kwarta sa sulod sang pila ka oras kun magahatag man ini sang kwarta.
Nagpasugot suno pa ang biktima kag ang ila transaksyon sa paghatagay sang kwarta ang natabo sa isa ka hotel sa General Santos City.
Yara sa P100,000 ang nakuha sa biktima nga naghalin pa sa gin utang nga kwarta sini sa iya abyan.
Sang nahatag na sini ang kwarta sang mga suspek, makaligad ang pila ka inoras ginhatagan man ini sang bundle sang ginapatihan nga kwarta.
Makaligad ang hinatagay sang kwarta naglisensya suno pa ang mga suspek nga maga CR apang wala na ang mga ini nakabalik pa.
Natukiban man sini nga lunsay papel ang ginhatag sa iya sang mga suspek nga ginbutangan lamang sang P1,000 sa atubang kag 500 SA idalom.
Tuman ang kabalaka sang biktima bangud wala na sini maabtan ang mga suspek kag wala mabawi ang iya kwarta.
Makaligad mabatian sa Bombo ang impormasyon angot sa mga natikma nga suspek kag miyembro sang Budol-Budol gang, nagdiretso ini sa Koronadal City PNP agud tsekyaron kun ini man ang mga persona nga nagbiktima sa iya kag ini ang kumpirmado.
Nakahanda naman ini magsang-at sang kaso batok sa mga suspek.
Madumduman nga ang mga suspek ang ginkilala kanday Manny Diaz nga residente sang Dasmarinas, Cavite; Ricardo Villaro nga taga Tondo, Manila; kag si Brenda Castigador, nga taga-Manila man apang ginaaligar nga taga-Mlang North Cotabato nga madinalag-on nga naarestar sang Koronadal City PNP sang tinalikdan nga semana.
