KORONADAL CITY- Nagapatigayon na suno pa sang pasekreto nga operasyon an Kabus Padatoon Community International Ministry sa syudad sang Koronadal sa pihak sang stoppage order nga ginpagwa sang korte batok sa nasambit nga grupo bangod sa ila fraudulent activities.
Sa impormasyon nga ginpalab-ot sang isa ka insider sang KAPA, nagsugod na suno pa ang pagpay-in sang mga anay kag bag-o nga miyembro kun sa diin isa ka nagapangalan nga Greg ang naga organisa sang bag-o nga pagsulundan sa pag invest sang kwarta.
Dugang pa sini nga temprano nga nagpadulong ang mga miyembro bangud alas 8:30 pa lamang sang aga sarang na nga maka pay-in apang hugot nga ginadumilian ang pag usar sang cellphone sa sulod sang opisina ilabi na ang pagkuha sang mga laragway sang nagakatabo sa sulod kun sa diin front lamang ang ginasiling nga pagpangamuyo agud ipadayon ang operasyon.
Dugang pa nga ginpaandaman man suno pa nga iga-blacklist ang mga miyembro nga magapost sang anuman nga operasyon sa KAPA ilabi na sa ila pasekreto nga operasyon.
Kaangot sini una na nga ginkumpirmar sa Bombo Radyo Koronadal ni Police Col. Joel Limson, Police Provincial Director sang South Cotabato PNP nga may impormasyon na sila nga nabaton nga may plano nga mag operate ang KAPA sa idalom sang bag-o nga pangalan kun sa diin ginpaandaman sini ang grupo nga nakamonitor ang PNP sa ila hulag kag untaton na ang pagpanonto nga ginahimo sa mga miyembro.
Nahibaluan nga 40% na ang ginapromisa nga return on investment sang KAPA sa ila mga miyenbro nga liwat maga invest sang ila mga kwarta.
