KORONADAL CITY- Nagapadayon ang panawagan sang Bureau of Immigration ukon BI sa mga Pilipino ilabi na sa mga kababaihan batok sa nagadata sa gihapon nga online love scams makaligad natukiban nga ang nasambit nga ahensya ang gina-usar man sang mga sindikato.
Ang nasambit nga iskema ang ginaka imbolbaran sang mga foreigners nga nagapakig-abyan kag nagapangaluyag sa mga Pinay nga ila makilala pinaagi sa internet.
Modus suno pa sini nga agud makuha nila ang salig sang mga Pinay ilabi na ang may mga edad na nga kababaihan, ginapadal-an sang mga suspek ang mga ini sang dyutay nga mga regalo.
Makaligad sina, maga arrange na sang ila meet-up ang mga suspek kag papatihon ang biktima nga magapadulong ang foreigner sa Pilipinas kag sa tion nga isiling sang mga suspek nga yara na ang foreigner sa pungsod makabaton sang tawag ang Pinay halin sa nagapakuno-kuno nga Immigration Officer kag magasiling nga nakawatan suno pa ang foreigner kag magapangayo sang kwarta kag bayaran lang ini kun magakitaay na sila.
Sa tion naman nga mapapati sang mga suspek ang ila biktima kag makapadala na sang kwarta, indi na magakontak ang foreigner sa iya.
Pagpaandam sang BI nga wala sila nagakontak sa mga non-passengers kag wala naga demand ang ila ahensya sang kwarta bisan kay sin-o man.
Responsibilidad lamang sang BI nga ikustodiya ang foreigners nga naga-abot sa airport ilabi na kun ma deny ang mga ini sang entry sa pungsod.
Sa tion nga indi matugutan nga makasulod ang isa ka foreigner sa Pilipinas, gilayon ini nga ginapabalik sa ginhalinan nga pungsod.
Ang nasambit nga pagpaandam ang kasunod sang asud-asod nga mga Pinay nga nabiktima sang mga online love scams nga nagabayad sang P40,000, P100,000 kag masobra pa para sa nasambit nga modus.
