KORONADAL CITY- Panawagan subong sang mga investors sang isa ka investment scam sa syudad sang Tacurong nga ibalik na ang ila gin-invest nga kwarta.
Sa esklusibo nga interbyu sang Bombo Radyo Koronadal kay Alyas Isko, isa sa investors sang NMC Investment Scam, nabaligya na suno pa sini ang iya nga hinuptan nga karbaw sa paglaum nga makabaton sang dako nga pay-out.
Suno kay Alyas Isko, nagapanguna suno pa sa nasambit nga investment scam ang pila ka opisyal sa Brgy Rajah Muda, sa nasambit nga syudad kun sa diin modus suno pa sini ang promisa nga 400% nga interes kada bulan.
Lakip suno pa sanday Brgy Rajah Muda Kapitan Doray Bauya, former Brgy Captain William Boy French kag ang gina-alegar nga founder nga si Pastor Allan Dinapil sa pagpadalagan sang nasambit nga investment scam.
Ginbuyagyag man sini nga halos tanan sa mga residente sa ila nga barangay ang natuntuhan sang investment scam kun sa diin minilyon nga kwarta ang nakuha sang mga nagpakilala nga founders.
Posible man suno pa nga nakapang-biktima ang mga ini sa kaiping nga banwa kag probinsya.
Sa karon, wala sa gihapon sila sang may nabaton nga pay-out kag makapila na ka bes nga ginpromisahan nga ibalik ang ila nga kwarta.
Kun tigayon suno pa nga indi mabalik ang ila nga kwarta, desidido ang mga ini nga magsang-at sang kaso.
Bukas naman ang Bombo Radyo Koronadal sa mga gina akusahan nga ipa-athag ang ila nga bahin batok sa mga reklamo sa ila.
