KORONADAL CITY– Nagpangayo sang bulig ang isa ka staff sang isa ka employment agency angot sa duha ka mga menor de edad nga ginpadala sa ila sang isa ka recuiter agud nga magtrabaho sa abroad.
Sa interbyu sang Bombo Radyo Koronadal kay Aimee Delos Reyes, anay empleyado sang OWWA kag sa karon nagatrabaho na sa isa ka employment agency, dismayado sila makaligad nga ang ginpadala sa ila nga mga workers sang recruiter nga si Noraiza Napeles ang lunsay mga menor de edad nga yara sa Grade 8 kag Grade 10.
Ang wala na ginhingadlan pa nga mga menor de edad ang mga residente sang Buluan, Maguindanao kag plano mag abroad bangud sa tuman nga kapigaduhon.
Natukiban man nga mga peke ang iban nga dokumeto nga gin usar agud ma qualify ang mga menor de edad apang sa ginpatigayon nga imbestigasyon indi sila pwede mag abroad.
Ang ila nga recruiter ang nahalin sa syudad sang Cotabato.
Samtang sa pihak nga bahin, sa interbyu sang Bombo Radyo Koronadal kay Noraiza Napeles, ang recruiter halin sa Cotabato City wala ginpanginwala sini ang akusasyon nga sya ang nagduso sa mga menor de edad nga mag apply sa abroad.
Ginbasol pa sini sa employment agency ang natabo nga wala matsekyar kag ginpahayag nga wala suno pa siya napangwarta sa mga kabataan.
Kaangot sini nakabalik na sa rehiyon 12 ang mga menor de edad makaligad mabaklan sang plane tickets papuli.
