KORONADAL CITY- Nagpositibo ang 38 ka mga preso sa South Cotabato Provincial Jail makaligad nga magpaidalom ang mga ini sa random drug testing.
Ini ang ginkumpirmar ni South Cotabato Provincial Jail Warden Felecito Gumapac sa esklusibo nga interbyu sang Bombo Radyo Koronadal.
Suno kay Gumapac, lunsay ang mga preso man sa sulod sang jail facility ang nakig-angot sa ila nga may pila ka mga preso ang naga-usar sang iligal nga druga.
Partikular nga gintumod sini amo ang mga inmates nga yara sa sulod sang selda 9 kun sa diin narekober ang 3 ka sachets sang ginapatihan nga shabu at 5 ka cellphones.
Posible suno pa nga ginhaboy sang pila ka mga inmates ang nasambit nga druga kasunod sang ginpahugtan nga kampanya kontra iligal na droga sa jail facility.
Bangud sini, gilayon sila nga nagpatigayon sang drug testing kun sa diin sa 57 nga mga preso sang selda 9, 16 diri ang nagpositibo sa pagusar sang iligal nga druga.
Samtang, nadugangan man suno pa ang nasambit nga numero makaligad ang ginpatigayon nga random drug testing sang Agosto 12, 2019 kun sa diin dugang nga 22 ka mga preso ang nagpositibo sa druga.
Kaangot sini, mas ginapahugtan na sa karon ang pagsulod sang mga nagabista sa mga inmates mangin man ang pagpatuman sang seguridad sang mga gwardya.
Ini ang agud indi na makalusot pa ang iligal nga kontrabando sa sulod sang provincial jail sang South Cotabato.
Sa karon, ipatuman ang total cleansing sa sulod sang South Cotabato Provincial Jail.
