KORONADAL CITY – Nagsaka pa sa masobra sang isa ka libo ang numero sang mga pamilya nga nagbakwit bangud sa kahadlok nga maipit sa kinagamo sa tunga sang militar kag BIFF-ISIS inspired group sa boundary sang Pikit, North Cotabato kag Maguindanao.
Suno kay Pikit Municipal Disaster Risk and Reduction officer Tahira Kalantungan, ang mga pamilya nga nagbakwit ang halin pa sa nagkalain-lain nga banwa kun sa diin ang mga dependents ang ginabulubanta nga yara sa masobra 4,000 katawo.
Sa karon, temporaryo nga nagatinir ang mga bakwit sa mga buluthuan kag moske nga problema man suno pa ang pagbaha kada magbubo ang mabaskog nga ulan.
Magluwas sa mga pamilya nga taga-Pikit, North Cotabato, may mga pamilya man nga nagbakwit na halin sa Maguindanao.
Dugang pa ni Kalantungan, nagpalab-ot na sang bulig ang lokal nga gobyerno sa mga pamilya nga apektado sang nasambit nga operasyon kag nagpanwagan naman ini sa mga luyag pa nga magpalab-ot sang bulig ang mahimo nga makig-agot sa ila nga opisina.
