KORONADAL CITY – Nagapadayon sa gihapon tubtob sa sini nga tinion ang imbestigasyon sang Koronadal City PNP makaligad ang insidente sang pagpangbuno sa Alunan Avenue padulong sa Brgy. Paraiso syudad sang Koronadal.
Sa impormasyon nga nakuha sang Bombo Radyo Koronadal, ginkilala ang biktima nga babaye nga si Allysa Danica Basa, 19 anyos kag residente sang Prk. Triniville, Blk. 4 sa Brgy. Zone 4 syudad sang Koronadal samtang ang suspek naman amuh ang iya live in partner nga si Eduardo Sinet yara sa legal nga pang edaron kag residente sang Brgy. Paraiso syudad sang Koronadal.
Base sa impormasyon, nagapanglakaton suno pa ang mga ini padulong sa Brgy. Paraiso sang makabati ang mga traysikel driver sang mga pag binaisay kun sa diin gulpi na lamang ginbuno sang suspek ang iya live in partner sa dughan kag sa bahin sang liog nga gintunaan sang kamatayon sang 19 anyos nga biktima.
Sa karon nagpatigayon na sang operasyon ang Koronadal City PNP agud madakpan ang suspek.
