KORONADAL CITY- Naka standby na subong ang pila ka tropa sang 27th Infantry Battalion sa boundary sang Barangay Ned Lake Sebu, South Cotabato kag Brgy. Molon, Palimbang, Sultan Kudarat makaligad ang iligal suno pa nga pag ukopar sang pila ka armado nga katapo sang Moro Islamic Liberation Front o MILF kag sang kasamtangan nga barangay kapitan sang Brgy. Molon, Palimbang SulKud sa portion sang Brgy. Ned Lake Sebu, SoCot.
Sa ekslusibo nga interbyu sang Bombo Radyo Korondal kay Lieutenant Colonel Jones Otida, battalion commander sang 27th Infantry Battalion, nagpanindugan ini nga ang iligal nga pag ukopar sang kampo ni Kapitan Adam sa bahin sang Ned ang nagtuga sang kinagamo suno pa sa lugar kun sa diin may napagkit nga baslanay sang lupok sang armas nga nagresulta sa pagbakwit sang masobra 600 ka mga residente.
Dugang pa ni Col. Otida nga kun magpadayon pa ang iligal nga pagsakop sang pila sa lugar, mapilitan ang tropa sang gobyerno nga magpatigayon sang operasyon kag ipatuman ang laye.
Madumduman nga una na nga nagpalapit sa Bombo Radyo Koronadal si kapitan Adam agud klaruhon nga indi suno pa Rido ang nagluntad kag ang nagapanggamo lamang suno pa amuh ang anay kapitan sang Brgy. Molon nga si Khalid Kaing nga napatigayon sang strafing kag ambush sa lugar.
