KORONADAL CITY – Ginapasiguro sang South Cotabato PNP ang implementasyon sang Cease and Desist Order nga ginpagwa sang Securities and Exchange Commission kag ang pag revoke sang license to operate sang Kabus Padatuon o KAPA investment sa Koronadal kag sa iban nga lugar sa South Cotabato.
Sa ekslusibo nga interbyu sang Bombo Radyo Koronadal kay Police Colonel Joel Limson hepe sang SoCot PNP, nagapakig-angot na sa ila ang SEC angot sa pagpasarado sang KAPA kag nakaabot naman sa ila ang pag revoke sang license to operate sini.
Dugang pa ni Limson nga tanan nga mga business connections sang KAPA ang indi na pwede mag operate sa South Cotabato ukon sa iban nga bahin sang pungsod kun sa diin ginahulat na lamang ang presensya sang SEC agud makapatigayon sang operasyon.
Kaangot sini bangud sa mainit nga pagtalakay sang Bombo Radyo Koronadal sa KAPA investment scam, nakabaton sang pamahog ang Assistant Station Manager sang Bombo Radyo Koronadal nga si Bombo Bing Endaya nga nagasiling nga pagpauli sini patay na ang iya pamilya kag nakasulod na sa lungon ang bata sini.
Suno kay Col. Limson isa ka seryoso nga pamahog ang ginpalab-ot sa ASM sang Bombo kag nagapakigbuligay sila agud matumod ang dummy account nga yara sa likod sini
