KORONADAL CITY – Nagapabilin sa gihapon sa nagkalain-lain nga evacuation centers ang kapin 2,000 nga mga residente nga apektado sang nagapadayon nga engkwentro sa tunga sang militar kag Daesh-inspired Bangsamoro Islamic Freedom Fighters (BIFF) sa Maguindanao.
Kaangot sini, ginpahayag sa Bombo Radyo Koronadal kay 6th ID Philippine Army spokesperson Major Arvin Encinas nga nagpalab-ot na sang bulig ang militar sa 1,800 ka pamilya halin sa tatlo ka banwa sang nasambit nga probinsya.
Ginpahayag man ni Encinas nga nagapadayon ang ila clearing operations partikular na sa SPMS box ukon ang Salibu-Pagatin-Mamasapano, Shariff Aguak, kag Datu Salibu kun sa diin ginapatihan nga nahamtang ang grupo ni Salahuddin Hassan.
Samtang ginpabugal man sang opisyal ang pagkarekober sang mga war materials sa kampo sang terror group, kalakip na ang 24 ka anti-personnel mines sa isa ka adlaw nga operasyon sang damlag lang.
Sa subong yara sa 20 ka terorista na ang napagkit nga patay sa nasambit nga engkwentro kalakip na ang pila ka high-value targets kag mga foreign terrorists.
