KORONADAL CITY- Yara na sa kustodiya sang mga otoridad ang 5 suspek nga naarestar sa ginpatigayon nga drug buybust operation sa syudad sang Koronadal kaina sang aga.
Sa interbyu sang Bombo Radyo Koronadal kay Dr. Glorio Sandig, City Anti-Drug Abuse Council ukon CADAC Officer sang Koronadal City, ginkilala sini ang mga suspek nga sanday John Nambong, 44-anyos; Michael Lucido, 44-anyos; Cerilo Villa, 38-anyos nga lunsay residente sang Koronadal City; Ramil Lee Ross Majarucon, 45-anyos kag Raymond Hechanova, 45-anyos nga lunsay residente ng Banga, South Cotabato.
Nagagwa sa inisyal nga imbestigasyon nga naaktuhan mismo sang gintingob nga pwersa sang CADAC Koronadal, PNP kag PDEA 12 ang mga suspek nga nagapatigayon sang pot session sa Prk Garfin, Brgy Paraiso sa nasambit nga syudad apang nakapalagyo suno pa ang isa sa mga suspek nga si Nambong apang tigayon man nga nagsungka sa mga otoridad.
Narekober sa nasambit nga mga suspek ang 8 sachets sang suspected shabu, 1 sachet sang marijuana kag drug paraphernalia.
Nahibaluan nga si Nambong ang yara sa drug watchlist kag madugal na nga ginalagas sang mga otoridad.
Yara sa ginabulubanta nga P42, 500 ang kantidad sang nakumpiskar nga druga sang mga otoridad.
Sa karon, natalana na nga sang-atan sang kaso nga paglapas sa RA 9165 ukon Comprehensive Dangerous Drugs Act 2002 ang mga suspek.
