KORONADAL CITY- Ginakabig nga blessing halin sa langit na eksperyensyahan nga pag-ulan sa bug-os nga rehiyon 12 humalin kagaina sang kaagahon tubtob subong nga udto.
Nahibaluan nga pila ka adlaw naman nga naka-eksperyensya sang tuman nga dry spell ang bug-os nga rehiyon nga nagtuga sang minilyon nga damyos sa mga pananom kun sa diin pila sa mga banwa ang ginpaidalom na sa state of calamity.
Sa interbyu naman sang Bombo Radyo kay Philippine Atmospheric, Geophysical and Astronomical Services Administration o PAGASA 12 forecaster Benrio Biñan nga ang nabatyagan nga pag ulan ang dala sang easterlies ukon hangin sa nasidlangan nga bahin sang pungsod nga nagadala man sang mapanganuron nga panahon kag pagpangilat.
Kaangot sa naeksperyensyahan nga pag-ulan nabuhian man sang paglaum ang pila ka mga mangunguma bangud kun magapadayon pa ang pag-ulan makasurvive na ang ila mga pananom apang base naman sa mga eksperto, indi dapat magpakampante ang mga pumuluyo sa nabatyagan nga pag-ulan bangud madasog magbaylo ang dalagan sang paniempo rason nga dapat preparahan sa gihapon ang El Niño.
