KORONADAL CITY- Pormal na nga gindeklarar nga adopted daughter sang South Cotabato si 2018 Miss Universe Catrional Elisa Magnayon Gray bangod sa nangin kontribusyon sini agod nga mas makilala pa ang probinsya pinaagi sa pagsuksok sini sang sacred Tnalak cloth.
Nahobaluan nga isa ka South Cotabateño ang nagdesign sang isa sa mga iconic gowns kag ang national costume ni Gray nga si Jearson Demavivas kun sa diin nakabulig man ini agod nga mas mapabaskog pa ang patag sang fashion industry kag ginhatagan sang kabuhi ang kultura sang mga Tboli sa South Cotabato.
Dugang pa sini nga isa ka dako nga kadalag-an para sa tribo nga Tboli nga mapakilala kag mapakita sa bug-os nga kalibutan ang ila nga kultura pinaagi sa Miss Universe Organization kun sa diin mas magbaskog pa ang turismo kag nagdamo ang suporta nga nabaton agod nga palabuon ang ila kultura sa paghahabi.
Ginalauman nga personal nga dawaton ni Gray ang nasabit nga pagkilala pag abot sini sa pungsod subong nga tuig.
