KORONADAL CITY – Wala nalikawan nga magbalik-lantaw ang pila ka kaparian kag mga tumuluo, sa kabuhi ni late Bishop Emeritus Dinualdo Gutierrez makaligad nabalitaan nga nagtaliwan na ini.
Sa interbyu sang Bombo Radyo Koronadal kay Fr. Joseph Benitez, isa sa mga pari sang Diocese of Marbel, isa ka dako nga kawad-an si Bishop Gutierrez sa Simbahang Katolika bangud kasubong nga amay na ang bansag nila sa iya.
Gin-ako sini nga madamo siya sang natun-an sa nagtaliwan nga obispo, kag pagadal-on niya ang nasambit nga mga leksyon bilang handumanan.
Samtang emosyonal naman nga ginpakigbahin sang personal cook sni nga si Shiela ang nangin eksperyensiya sini sa iya pagserbe kay Gutierrez.
Suno sa iya, paborito suno pa sini ang utan, sinabawan nga isda kag kun kis-a karne.
Ginpasalamatan man sini ang kaayo nga ginpakita sa ila sang buhi pa ini.
Apela subong sang Diocese of Marbel sa mga tumuluo nga ilakip sa ila mga pangamuyo kag intensyon ang kalag ni Bishop Gutierrez.
Nagtaliwan si Gutierrez pasado alas 5 kahapon sang aga sa isa ka ospital sa General Santos City sa edad nga 79 bangud sa balatian nga cancer kag chronic obstructive pulmonary disease (COPD).
