KORONADAL CITY- Nagapadayon sa karun ang imbestigasyon sang mga otoridad kaangot sa mga matag-as nga kalibre sang armas nga narekober sa Brgy. Buayan Datu Piang, Maguindanao nga ginapanag-iyahan sang rebelde nga grupo nga Bangsamoro Islamic Freedom Fighters ukon BIFF.
Nahibaluan nga palamangkutanon sa gihapon kun paano nalipod sang armado nga grupo ang mga armas nga ginakabug-usan sang 1 M653 carbine, 1 M653 carbine COLT AR-15, 1 M203 40MM GL, 1 cal .45 pistol, 1 cal .38 pistol kag assorted magazines and ammunitions sa sulod sang isa ka comfort room sang Barangay Hall sang Brgy. Buayan sa nasambit nga banwa.
Suno naman sa mga residente sa lugar masami suno pa nga masiplatan ang presensya sang mga armado nga grupo sa ila nga barangay nga nagtuga sa ila sanag kahadlok ilabi na sang makumpirmar nga BIFF members ang mga ini.
Posible man suno pa nga may ginaplano nga pag atake ang BIFF sa nasambit nga lugar.
Ginpasalamatan naman sang 6th Infantry Division Philippine Army sa pagpanguna ni Major General Cirilito Sobejana ang kooperasyon sang mga residente sa lugar.
