KORONADAL CITY- Nakapreparar suno pa ang Commission on Election nga atubangon ang anu man nga reklamo ukon petisyon sa resulta sang ginpatigayon nga plebisito sang Bangsamoro Organic Law sa probinsya sang North Cotabato.
Ini ang ginpasiguro ni Atty. Jay Gerada, provincial election supervisor sang North Cotabato sa interbyu sang Bombo Radyo Koronadal.
Suno kay Gerada, tiwala siya sa resulta nga ila nga ginsumiter sa National Board of Canvassers kun sa diin 63 nga halin sa 67 barangay ang naghalin man sa 7 ka banwa ang nag boto sang “yes” nga malakip sa Bangsamoro Autonomous Region in Muslim Mindanao (BARMM).
Kalakip sa mga barangay nga wala nag pabor sa BOL ang Barangay Galidan halin sa banwa sang Tulunan, 2 barangay halin sa sa Aleosan kag isa sa Pikit.
Napaslawan naman ang Comelec nga makuha ang 70% nga target sang voters turnout bangod yara sa 55% lamang ang mga nagboto.
Apang sa pihak sini makabig suno pa nga nagbinungahon ang plebesito bangod kay wala sang kalakasan nga nagluntad tubtob matapos ang pag inisipay.
Nahibaluan nga ang pila ka mga barangay nga nakasali sa plebisito ang mga lugar kun sa diin ang masami nga may nagaluntad nga kinagamo.
