KORONADAL CITY- Nagalaum ang Commission on Elections ukon COMELEC nga makaangkon sang mataas nga turnout sang mga botante sa ginapatigayon nga second round sang Bangsamoro Organic Law Plebiscite sa Lanao del Norte kag North Cotabato.
Sa interbyu sang Bombo Radyo Koronadal kay COMELEC 12 Director Michael Abbas, nga nakatutok sila subong sa ginapatigayon nga plebisito ilabi na sa banwa sang Pikit, North Cotabato nga may yara sang 23 ka mga barangay nga kalakip sa plebisito.
Samtang sa pihak nga bahin, ginakabig nga crucial ang plebisito subong nga adlaw bangud dire nakasalalay ang decommissioning process sang mga rebelde sang Moro Islamic Liberation Front o MILF.
Sa tion nga magdaog suno pa ang BOL sa nasambit nga mga lugar, makaangkon sang maayo nga transition sang MILF members halin sa rebelde padulong sa sibilyan.
Nahibaluan nga pabudlayanay ang botohan para sa BOL bangud challenge nga madag-an ang double majority nga nagakahulugan nga dapat ang mga residente sa nasambit nga mga area nga luyag malakip sa BARMM ang kinahanglan man makuha ang Yes votes sang ila mother units bangud kun mapaslawan sila indi ang mga ini malakip..//
