KORONADAL CITY- Ginpasiguro ni Cotabato City kag Maguindanao Commission on Elections officer Atty. Ernie Palanan nga ginsunod sang COMELEC ang rule of law sa ginpatigayon nga plebisito ilabi na sa Cotabato City nga isa sa mga crucial nga lugar nga ginhiwatan sang botohan para sa ratipikasyon sang Bangsamoro Organic Law ukon BOL.
Sa interbyu sang Bombo Radyo Koronadal kay Atty. Palanan, bilang kabahin sang plebiscite committee, ginpasiguro sini nga wala siya sang gindampigan ilabi pa nga mainit ang political rivalry sa tunga sang alkalde sang Cotabato City nga si Mayor Cynthia Guiani-Sayadi nga indi pabor sa BOL kag ang kasumpong sini nga si Maguindanao 1st District Rep. Bai Sandra Sema nga pabor nga malakip ang Cotabato City sa Bangsamoro core territory.
Dugang pa sini nga nausar sini ang mga natun-an sa Bombo Radyo Philippines nga makaangkon sang patas nga implementasyon sa pagpatuman sang laye, magpamati sa kada bahin kag mangin disiplinado kag himuon kag sundon ang legal kag ang tama.
Nahibaluan nga si Atty. Palanan ang isa ka anay hard hitting commentator sang Bombo Radyo bag-o nangin Comelec officer.
Samtang nagpasalamat naman ini sa Armed Forces of the Philippine kag Philippine National Police sa maayo nga pagpatuman sang seguridad sa ginpatigayon nga plebisito.
