KORONADAL CITY – Tuman nga ginkalipay sang mga kongresista sang House of Represenstatives ang nangin resulta sang pagtutok sang PNP sa pagkamatay ni AKO Bicol Partylist Rep. Rodel Batocabe kag sang police escort sini.
Sa nangin interbyu sang Bombo Radyo Koronadal kay Cong. Albee Benitez sang 3rd District sang Negros Occidental, ginkalipay nila kag ginapasalamatan ang madasig nga imbestigasyon sang PNP sa pagtumod kay Daraga, Albay Mayor Carlwyn Baldo bilang mastermind sa krimen kag sa mga kaupdanan sini.
Suno kay Congressman Benitez, kaupod niya ang yara sa 180 nga mga kongresista ang nagkontribwer agud makakinot sang reward money sa kun sin-o ang makatudlo sa mga responsable sa krimen kun as diin yara sa P30,000 ang pinakanubo nga balor nga nahatag sang mga ini.
Dako naman ang pagpati sang opisyal sa mga ginbuyagyag nga datos sang PNP kag gintawag pa nga “very reliable” ang nangin pahayag sang mga testigo.
Sa subong ginalauman man sini nga tigayon na nga mapreso kag mapanabat ang mga nasambit nga suspek sa Batocabe slay-case.
