KORONADAL CITY – Nagpanawagan ang bana sang isa ka overseas Filipino worker sa Saudi Arabia nga buligan sila nga makapauli ini bangud sa pagpangmaltrayo sang iya amo.
Sa interbyu sang Bombo Radyo Koronadal kay alyas Junjun, 30 anyos kag residente sang banwa sang Tampakan, ginakulata kag wala ginapakaon subong man ginbaligya sa iban nga employer ang iya nga asawa nga si alyas Lyn.
Suno kay Junjun, nangin maayo ang pagtratar sa iya nga asawa sa pag-abot sini apang nagsugod ang iya kalbaryo sang nakabuka ini sang pinggan samtang nagatimpla sang kape.
Bangud sini, naghingyo sang bulig sa agency si Lyn kag ginsugid ang sitwasyon sini apang wala siya ginpamatian.
Apang, suno sa isa ka Pinay nga nagtawag sa ila nga kinahanglan ini nga papulion bangud wala na ini sang pahuway sa pagtrabaho.
Nahibaluan nga Mayo 2018 sang nagpadulong si lyn sa nasambit nga pungsod agud nga magtrabaho.
