KORONADAL CITY – Wala sang bisan isa nga Overseas Filipino Worker ang napilasan ukon napatay sa nasambit nga volcanic tsunami sa western coast sang Java island kag Sumatra sa Indonesia.
Ini ang ginpasiguro ni Bombo international correspondent Elmer Decina sa ekslusibo nga interbyu sang Bombo Radyo Koronadal.
Suno kay Decina nga 10 ka tuig na nga nagtrabaho sa nasambit nga pungsod, luwas ang mga OFWs sa nasambit nga kalamidad bangud kadam-an sa mga ini ang naga-istar sa mga syudad kasubong sang Jakarta.
Padayon man ang ginapatigayon nga rescue efforts sang mga rescuers kun sa diin mismo si Indonesian president Joko Widodo ang personal nga nagpadulong sa lugar agud tan-awon ang sitwasyon kag naghatag nga bulig.
Samtang, ginpasiguro naman sini sa iya mga abyan ka himata sa Cebu kag Bukidnon nga luwas ini sa nasambit nga kalamidad.
Base sa pinaka-ulihi nga report, yara sa 429 katawo na ang napatay, samtang halos 1,500 ang mga pilason kag 154 ang missing.
