KORONADAL CITY – Nagresulta sang kamatayon sang isa ka motorista samtang yara naman sa kritikal nga kondisyon ang backrider sini matapos nga mahulog ang ginsakyan nga motorsiklo sa tulay sa banwa sang Tampakan, South Cotabato.
Ginkilala ni PO3 Elton John Ehimplar sang Tampakan Municipal Police Station, ang napatay nga si George Sinawon, 50 anyos, nga driver sang motorsiklo samtang yara naman sa kritikal nga kondisyon sa karon ang backrider sini nga si Romanito Dumampil, 44 anyos nga residente sang Brgy. Carpenterhill, Koronadal City.
Sa interbyu sang Bombo Radyo Koronadal kay PO3 Ehimplar, ginpahayag sini nga halin sa fiesta sang Barangay Kipalbig, Tampakan, South Cotabato ang mga biktima kag papuli na sang nagluntad ang insidente.
Dako suno pa ang posibilidad nga nakainom ang drayber sang motorsiklo rason nga nadulaan ini sang kontrol sa pagpadrive tubtob nga nahulog ang mga ini sa tulay.
Nahibaluan nga dead on arrival sa ospital si Sinawon samtang padayon naman nga ginabulong si Dumampil.
