KORONADAL CITY – Tigayon nga ginbawian sang kabuhi ang isa ka nagadala samtang yara sa kritikal nga kondisyon naman ang asawa kag duha ka menor de edad sini makaligad gin-araro sang isa ka Mitsubishi Strada Pickup ang isa ka tricycle sa National Highway sang Brgy. Saravia siyudad sang Koronadal.
Sa interbyu sang Bombo Radyo Koronadal kay SPO1 Johana Heradora sang Koronadal City traffic section, wala na nasarangan pa ni Ginang Suzette Panes, 38 anyos, nga manugbata na kutani, ang pilas nga naangkon sa nagkalain-lain nga bahin sang iya lawas nga nangin tunaan sang kamatayon sini makaligad gindala sa ospital.
Wala man naluwas mangin ang lapsag sa iya tiyan.
Samtang padayon nga ginaobserbahan kag yara sa kritikal nga sitwasyon ang bana sini nga si Randolf Panes, ang nagmaneho sang tricycle kag duha ka mga bata nga sanday John Rudolf Panes, 8 anyos kag John Patrick Panes, 12 anyos nga lunsay mga residente sang Brgy Mabuhay, General Santos City.
Suno kay Heradora, nabunggo sang Mitsubishi Strada Pickup nga ginamaneho ni Almenzor Mamogkat Dotoya ang tricycle nga kolor blue nga nagabiyahe sa center lane sang highway pakadto kuntani sa ospital.
Sa kabaskog sang impact bangud sa madasig nga dalagan sang pickup, nagupi ang likod nga bahin sang tricycle kag nagtabog ang driver sini.
Nagsungka naman ang driver kag yara na sa kustodiya sang mga otoridad.
