KORONADAL CITY – “Justice now, convict Ampatuan” ini ang panawagan sang mga kabataan ni anay Bombo Radyo Koronadal chief of reporters Bombo Bart Maravilla sa Duterte administration kadungan sang pagkomemorar sang ika siyam nga tuig nga anibersaryo sang Maguindanao massacre nga kilala man bilang Ampatuan massacre nga nagluntad sang Nobyembre 23, 2009 sa Sitio Masalay, Brgy. Salman sa probinsya ng Maguindanao.
Sa ekslusibo nga interbyu sang Bombo Radyo Koronadal kay Janchiene Maravilla, emosyonal sini nga ginbalikan ang mga handurawan sang nagtaliwan nga amay kun sa diin ginpahayag sini nga apisar madugay na kag tuman ka hinay ang dalagan sang kaso, nagapati sa gihapon ini sa hustisya sa pungsod.
Nahibaluan nag subong nga adlaw kadungan sang komemorasyon sang ika siyam ka tuig sang Maguindanao massacre, nagbisita sila sa massacre site kaupod ang iban pa nga mga himata sang mga biktima kun sa diin naghalad sang misa kag nagpatigayon man sang sambayang ang mga kauturan nga Muslim, paghalad sang mga bulak kag may yara man sang candle lighting.
