KORONADAL CITY- Nagresulta sa kamatayon sang isa ka Moro Islamic Liberation Front Commander kag 2 ka mga kaupdanan sini ang ginpatigayon nga search warrant implementation sang gintingob nga pwersa sang Sultan Kudarat Police Provincial Office, Regional Intelligence Unit 12 kag Esperanza PNP sa banwa sang Esperanza, Sultan Kudarat.
Suno sa tagpamaba sang Sultan Kudarat PNP nga si PCI Ronnie Dardo, ginpatigayon ang search warrant implementation sa mga kaso angot sa iligal nga droga kag iligal nga mga armas Prk. Mangga Brgy. Villamor, Esperanza Sultan Kudarat batuk kanday Lakmodin Atam Sampulna 37 anyos, Mackoy Lingolan Guiemandal 45 anyos kag ang suno pa MILF 106th base commander nga si Salipuden M. Sampulna alyas kumander Puri kun sa diin sang ginsirbe suno pa ang search warrants gina alegar nga nagbato ang mga ini rason nga napilitan man magbato ang mga otoridad.
Narekober suno pa sa mga suspek ang nagkalain-lain nga mga armas, granada kag 2 ka pakete sang ginapatihan nga shabu.
Samtang ginpanginwala naman sang mga himata sang mga napatay nga nagbato sila kag sa baylo ang mga pulis suno pa ang una nga nagluthang sa mga suspek.
