KORONADAL CITY – Nabalaka ang pamunuan sang South Cotabato Rehabilitation and Detention Center sa padayon nga pag-usar sang iligal nga droga sang mga inmates sa provincial jail.
Ini makaligad nga magpositibo sa iligal nga droga ang 30 sa mga ini gikan sa masobra 300 nga ginpaidalom sa random drug testing.
Suno kay South Cotabato Provincial Jail Warden Juan Lanzaderas, wala nila ginalayman nga kasubong sini kadamo ang nagausar sang droga sa sulod apisar nga gindoble na sang mga ini ang pagbantay agud nga indi makalusot ang iligal nga droga.
Kaangot sini, plano naman nga isaylo sang selda ang mga nagpositibo nga preso agud nga matutukan sang maayo sang mga jail guards.
Aminado si Lanzaderas nga mahimo nga nakaangkon sang security lapses sa provincial jail rason nga nagalusot sa gihapon ang iligal nga droga.
Kadungan sini, ginpasiguro man ni Lanzaderas nga ini ang ila nga pagasolusyonan na.
