KORONADAL CITY- Nagpasalamat ang amay sang isa ka Overseas Filipino Worker sa Saudi Arabia nga biktima suno pa sang pagpangmaltratar sang iya nga amo makaligad yara na sa luwas nga kahimtangan ang iya bata kag nakatalana na nga magpauli sa pungsod.
Kun madumduman nga nagdangop sa Bombo Radyo Koronadal si Ginoong Ruben Sabal, amay sang OFW nga si Jane Sabal, 48 anyos halin sa Brgy. Titulok, Bagumbayan Sultan Kudarat agud ireklamo ang pagpang maltratar nga ginhimo sa iya nga bata kasubong sang indi paghatag sang nagakaigo nga oras agud nga magpahuway kag paghatag sang sweldo.
Nahibaluan nga gilayon nga gin aksyunan ang problema sang OFW pinaagi kay Bombo Correspondent Boyet Forro kag gilayon man nga nakig-angot sa Philippine Oveseas Labor Office o POLO agud mabuligan si Jane.
Sa karun yara na sa maayo nga sitwasyon ang Pinay Domestic Helper kag ginahulat na lamang ang iya sini nga flight papuli sa Pilipinas makaligad maasikaso na ang iya mga dokumento kag makuha naman sini ang iya nga sweldo nga wala nahatag sa iya sang iya nga amo.
