KORONADAL CITY– Nagapabilin nga alerto sa karun ang banwa sang Lambayong, Sultan Kudarat apisar nabalik na sa normal ang sitwasyon sa lugar kag makaligad nga napunggan ang plano nga pag-atake sang mga rebelde nga grupo sa nasambit nga banwa.
Sa interbyu sang Bombo Newsteam kay Mayor Ramon Abalos, natumod na ang motibo sa nasambit nga plano nag pag-atake kun sa diin target suno pa ang istasyon sang puli kag ang puluy-an mismo sang alkalde bangud sa wala suno pa mapunggan nga asud-asod nga pagpangluthang kag pagpatay sa pila ka mga residente sa lugar.
Kaangot sini, suno kay Mayor Abalos nga ang asud-asod nga shooting incidente ang indi dapat ibasol sa ila bangud kadamuan sang mga nagakalamatay amuh ang may kaangtanan sa krimen kag iligal nga droga kag kahimuan man ang mga ini sang ila mga nakaaway kag naka transaksyon.
Sa pihal nga bahin, suno naman sa bag-o nga hepe sang Lambayong PNP nga si PCI Julius Malcuntento, ginahimo sang kapulisan ang ila responsibilidad kag tanan nga operasyon nga ila ginapatigayon ang lehitimo kag base sa layi.
Nahibaluan nga nakabalik na sa ila mga puluy-an ang pila ka mga bakwit kag ginapasiguro man ang seguridad sang mga ini sa bulig sang militar.
